კომერციული ბანკების აქტივების მდგომარეობა
2010 წლის 1 ივნისის მდგომარეობით, საქართველოს საბანკო სექტორი 19 კომერციული ბანკითაა წარმოდგენილი; მათ შორის 13 – საწესდებო კაპიტალში უცხოური კაპიტალის მონაწილეობით და 2 – უცხოური ბანკის ფილიალით. წინა თვესთან შედარებით, საქართველოს კომერციული ბანკების მთლიანი აქტივები (მიმდინარე ფასებში) 90.2 მლნ ლარით, ანუ 1.0 პროცენტით გაიზარდა და 8807.5 მლნ ლარი შეადგინა. საბანკო სექტორის საკუთარი სახსრები 1539.1 მლნ ლარს შეადგენს, რაც კომერციული ბანკების მთლიანი აქტივების 17.5 პროცენტია.
უცხოური კაპიტალის მონაწილეობამ ბანკების მთლიან განაღდებულ საწესდებო კაპიტალში 77.2 პროცენტი შეადგინა.
მაისი, ისევე როგორც წინა თვე, საბანკო სექტორმა მოგებით დაამთავრა. მოგებამ თვის შედეგებით 4.4 მლნ ლარი, ხოლო წლის დასაწყისიდან 28.8 მლნ ლარი შეადგინა.
ხუთი უმსხვილესი აქტივების მქონე ბანკის წილი საბანკო სექტორის მთლიან აქტივებში წინა თვესთან შედარებით 0.6 პროცენტული პუნქტით შემცირდა და 78.4 პროცენტი მიაღწია.
საკრედიტო დაბანდების მოცულობამ 5.6 მილიარდ ლარს მიაღწია
კომერციული ბანკების საკრედიტო დაბანდების მოცულობა (არარეზიდენტებზე გაცემული სესხების ჩათვლით), მიმდინარე წლის 1 ივნისის მდგომარეობით, წინა თვესთან შედარებით, 1.7 პროცენტით გაიზარდა და 5.6 მლრდ ლარს მიაღწია. ეროვნული ვალუტით გაცემული სესხების მოცულობა 5.0 პროცენტით, ანუ 68.3 მლნ ლარით გაიზარდა, ხოლო უცხოური ვალუტით გაცემული სესხების მოცულობა – 0.6 პროცენტით, ანუ 23.0 მლნ ლარით.
რეზიდენტი იურიდიული პირებისათვის 2010 წლის მაისის ბოლოს კომერციულ ბანკებს ეროვნული ვალუტით გაცემული ჰქონდათ 662.5 მლნ ლარის (წინა თვესთან შედარებით 4.1 პროცენტით ანუ 25.9 მლნ ლარით მეტი), ხოლო უცხოური ვალუტით – 2.6 მლრდ ლარის (შესაბამისად, 1.0 პროცენტით ანუ 24.5 მლნ ლარით მეტი) მოცულობის სესხი.
იურიდიული პირების დაკრედიტების მთლიან მოცულობაში ყველაზე დიდი ხვედრითი წილი – 46.4 პროცენტი ვაჭრობის სფეროზე მოდის. წინა თვესთან შედარებით ვაჭრობის სფეროზე გაცემული სესხების მოცულობა 1.2 პროცენტით ანუ 17.9 მლნ ლარით გაიზარდა და 1.5 მლრდ ლარს გადააჭარბა.
მრეწველობაზე გაცემული სესხების წილი იურიდიულ პირებზე გაცემული ვადიანი სესხების საერთო მოცულობაში 23.7 პროცენტს შეადგენს, რაც 2010 წლის 1 ივნისისათვის 765.5 მლნ ლარით განისაზღვრა (2.3 პროცენტით ანუ 16.9 მლნ ლარით მეტი წინა თვესთან შედარებით); 11.0 პროცენტი მოდის მშენებლობაზე, რაც 356.7 მლნ ლარია (3.6 პროცენტით ანუ 12.6 მლნ ლარით მეტი, შესაბამისად). ამდენად, იურიდიული პირების დაკრედიტების საერთო მოცულობის 81.0 პროცენტი მხოლოდ სამ დარგზე – მრეწველობაზე, მშენებლობასა და ვაჭრობაზე მოდის.
2010 წლის მაისის განმავლობაში 1.9 პროცენტით ანუ 38.2 მლნ ლარით გაიზარდა რეზიდენტი ფიზიკური პირების დაკრედიტების მოცულობა და 1 ივნისისათვის 2.1 მლრდ ლარს მიაღწია.
დეპოზიტების მიმდინარე ტენდენციების შესახებ
საბანკო სექტორში განთავსებული მთლიანი დეპოზიტების (სამეწარმეო და შინამეურნეობების სექტორების მიმდინარე ანგარიშებისა და ვადიანი დეპოზიტების, აგრეთვე გადასახდელი პროცენტების ჩათვლით) მოცულობამ 2010 წლის 1 ივნისისათვის 3.7 მლრდ ლარს მიაღწია, რაც 0.3 პროცენტით ანუ 10.9 მლნ ლარით მეტია მიმდინარე წლის 1 მაისისათვის არსებულ მაჩვენებელზე. მაისში, წინა თვესთან შედარებით, ადგილი ჰქონდა სამეწარმეო და შინამეურნეობების სექტორების მიმდინარე ანგარიშების ზრდას 40.1 მლნ ლარით ანუ 3.1 პროცენტით.
დეპოზიტებზე საშუალო წლიური შეწონილი საპროცენტო განაკვეთი 7.9 პროცენტს შეადგენს, მათ შორის ეროვნული ვალუტით განთავსებულ დეპოზიტებზე – 10.0 პროცენტს, ხოლო უცხოური ვალუტით განთავსებულ დეპოზიტებზე – 7.5 პროცენტს.
უცხოური ვალუტით განთავსებულ დეპოზიტებში აშშ დოლარის წილი 77.4 პროცენტს, ხოლო ევროს წილი 21.2 პროცენტს შეადგენს.
წინამდებარე სტატისტიკური ინფორმაცია ქვეყნდება საქართველოს ეროვნული ბანკის ვებ–გვერდზე, სტატისტიკის რუბრიკაში მისამართზე: http://www.nbg.ge/ |
გიორგი ცუცქირიძე: მომავალში საკრედიტო აქტივობა კიდევ უფრო გაიზრდება 
